bb2

Дьону күллэрдэхпинэ санаам көтөҕүллэр…

Инстаграмҥа 30 тыһыынчаттан тахса сурутааччылаах @ananaaaaass элбэх сирэйдээх. Манна бааллар Гетла, Стелла, Саманта, Сонуннаах Суоппуйа, Мама, Гена уонна бэйэҥ саастыылааҕыҥ эрдэҕэс оҕо. Барыларын өҥнөөх оҥоһуу баттаҕы уларыта сылдьан биир кыыс оонньуур. Кини сатаан күннээҕи олоххо күлүүлээҕи булан, таба таайан көрдөрөр дьоҕурдаах. Хас биирдии видеотын көрө олорон, “наһаа даа үүт-үкчү” диэн саҥа аллайыаххын баҕараҕын. Кини ким эбитий?


Ааккын-суолгун билиһиннэр эрэ, ханнык оскуолаҕа, хаһыс кылааска үөрэнэҕин?

Мин аатым Настя ДЬЯКОНОВА. С.К.Макаров аатынан Чурапчы улууһун гимназиятыгар IX кылааска үөрэнэбин.

"Инстаграмҥа" аккауҥҥун хаһан ыытан саҕалаабыккыный?

— "Инстаграммын" 2015 сылга арыммытым уонна 2019 сылтан вайн уһулан саҕалаабытым.

Хара маҥнайгыттан персонаажтардаах этиҥ дуо?

Бастаан персонажтарым суох этилэр, бэйэбин эрэ уһулар этим.

Персонажтаргын хайдах толкуйдаабыккыный? Ким бастакы баар буолбутай?

Аан бастакы персонааһым “Мама” этэ, онтон учуутал Стелла Гаврильевна баар буолбута.

Мама
Мама

Ордук элбэхтэ көрдөрөр дьоруойуҥ кимий?

Ийэ уонна учуутал оруола.

Кылгас көрүдьүөс устууларгын хайдах толкуйдуугун? Эрдэттэн тугу эмэ сурунаҕын дуу?

Итинник устууларга бэйэм олохпор дьиҥнээхтии буолбут түгэннэри көрдөрөбүн. Хайаан да сценарийдаах уһулабын.

Гетла
Гетла

“Чувство юмора” диэн киһиэхэ барытыгар баар дии саныыгын дуу, ураты дьоҕур дуу?

Арааһа, киһиэхэ барытыгар баар буолбат быһыылаах. Сорох дьон оонньоон этиини олох өйдөөбөт, ылыммат.

Айар үлэҕэр иэйииҥ туохтан кэлэрий?

Саҥа толкуй киирдэҕинэ устунан иэйии бэйэтэ киирээччи.

Гена
Гена

Дьону сатаан күллэрэр сатабыл олоххо туох туһалааҕый?

Көрүдьүөс видеолары устан саҕалаабыппыттан олоххо сыһыаным кыратык уларыйда дии саныыбын. Дьону күүлэрдэхпинэ бэйэм хомойбутум ааһар уонна санаам көтөҕүллэр.

Настя, хоруйдарыҥ иһин махтал! Өссө да бу курдук дьону-сэргэни үөрдэ-көтүтэ тур! Айар үлэҕэр ситиһиилэри!