Кини бу кэнники кэмҥэ үгүс ситиһиилэннэ: «Мама, я тебя люблю» уонна «Зимушка-зима» Бүтүн Арассыыйатааҕы оҕо уруһуйдарын күрэхтэригэр бастаабыт; Саха норуотун сээркээн сэһэнньитэ Н.Е.Мординов-Амма Аччыгыйа төрөөбүтэ 115 сылын көрсө куйаар ситимин нөҥүө «Онус “Тоҕо?”» кэпсээн айан суруйуу күөн-күрэһигэр иккис миэстэ буолбут, суруйааччы айымньыларынан уруһуй куонкуруһугар миэстэлэспит, маны таһынан оскуолатын «Кэрэмэн» муода куруһуогун оҕолорун кытта «Зима начинается с Якутии» бэстибээлгэ ситиһиилээхтик кыттыбыт.
— Илона, эн тускунан истэн олус үөрдүм, улахан ситиһиилэргинэн эҕэрдэлиибин! Эн олус талааннаах оҕо эбиккин. Бу ситиһиилэрин таһынан өссө ханна кыттан миэстэлэспиккиний, биһирэмнэммиккиний?
— Мин өссө хоһоон ааҕарбын сөбүлүүбүн, Улуу Кыайыы 75 cылыгар аналлаах уус-уран ааҕыыга иккис миэстэ, «Самый читающий класс» улуустааҕы күрэххэ бастакы миэстэ буолбутум.
— Үөрэххэр хайдаххыный? Ханнык уруогу сөбүлүүгүнүй?
— Мин үөрэхпэр үчүгэйбин. Сөбүлүүр уруоктарым - саха тыла, английскай тыл уруога, физкультура уонна уруһуй.
— Уруһуйдаргар ордук сөбүлээн тугу ойуулуугунуй?
— Мин куоскалары, ыттары уруһуйдуурбун сөбүлүүбүн.
— Ити «Онус «Тоҕо?»» диэн күрэскэ миэстэлэспит кэпсээниҥ ис хоһооно олоххо дьиҥнээхтии буолбута дуу, өйгүттэн айан суруйбутуҥ дуу? Ити айымньыҥ киһини туохха үөрэтэрий дии санаатыҥ?
— Мин Кузя диэн мааны куоскабын кэпсээммэр киллэрбитим, маны таһынан Сайаан уонна Арылхан диэн кылааһым оҕолорун персонаж оҥортообутум. Оттон ис хоһоонун өйбүттэн оҥорбутум. Кэпсээним кыыллары сөбүлүүргэ, аһыныгас буоларга үөрэтэр дии саныыбын.
— Үөрэҕиҥ таһынан тугунан дьарыктанаҕыный? Ханнык оонньуулары оонньуугунуй?
— Мин дьүөгэбин Никаны кытта таһырдьа, дьиэҕэ араас оонньууну оонньооччубут. Хаар киһи оҥоробут, сасыһа, хаар быраҕаттыы оонньуубут.
— Улааттаххына ким буолуоххун баҕараҕыный?
— Мин улааттахпына быраас буолуохпун, дьоннору эмтиэхпин баҕарабын.
— Арай, эн улаатан бараҥҥын суруйааччы буол, туох туһунан суруйуоҥ этэй?
— Мин суруйааччы буоллахпына кыыллар уонна оҕолор тустарынан суруйуом этэ.
— Илона, аҕыйах боппуруоспар хоруйдаабыккар махтанабын, инникитин ситиһиилэри баҕарабын уонна өссө даҕаны уруһуйдаргынан, айымньыларгынан бар дьоҥҥун үөрдэ туруоҥ диэн эрэнэбин!
Кэпсэттэ Ираида Коркина-Чугдаара