bb2

Парашютунан ыстанар уустук дуо?

Парашютунан ыстанар хайдах эбитий? Ити туһунан быйыл парашютунан аан бастакытын ыстаммыт Мария УДЫГИР кэпсээтэ.


Бөртөлүөт бүрүлүүр тыаһыгар халлааҥҥа току-току ньээм-ньээм чэчиктэрэ арыллалларМап-маҥан төгүрүктэр аа-дьуо элиэлээн сир диэки түһэллэр. Хонууга рациялаах дьон парашютунан түһээччилэри көрсө үс аҥыы сүүрэллэр. Биир кэм тула “Команда “Земля!” диэн биллэрэллэр. Онтон от быыһыттан кааскалаах дьон быган, илиилэрин үөһэ өрө ууналлар. Ити аата этэҥҥэ түспүттэрин биллэрэллэр.

Парашютунан ыстанар хайдах эбитий?

Маша: Парашютунан ыстанар олус долгутуулаах. Ол эрээри, бөртөлүөккэ олордуҥ да, кутталыҥ ааһар. Ордук үөрэнэ сылдьан айманар этим. Көтүөхпүт иннинэ икки күн үөрэммиппит. Онно алҕас оһоллоннохпутуна тугу гыныахтаахпытын көрдөрбүттэрэ, хас биирдии хамсаныыбытын чочуйбуттара. Ол сылдьан, дьэ, ону-маны толкуйдаан, ойуулаан көрөн долгуйбутум. Онтон бөртөлүөт сиртэн тэйээтин кытта кутталым сүппүтэ, сөпкө ыстанар эрэ туһунан толкуйдаабытым.

Взлет
Бөртөлүөккэ олоруу

Соҕотох ыстаммытыҥ дуу? Инструктордаах этиҥ дуу?

Маша: Үгүс дьон санаатыгар бастакы ыстаныы “тандемҥа” ааһыахтаах. Ол эрээри, оннук буолбатах эбит. Биһиги ыстаммыт парашюппут аармыйаҕа туттуллар Т-634 этэ. Инструкторбыт этэринэн, киһи сиргэ этэҥҥэ түһүөм диэн 99,9% эрэллээх буолар эбит. Ол иһин соҕотох ыстанартан куттамматахпыт. Эбии саппаас парашюттаах этибит.

Төһө түргэнник түспүккүнүй?

Маша: Түһэриҥ түргэнэ ыйааһыҥҥыттан тутулуктаах. Ортотунан сөкүүндэҕэ 5 м ааһаҕын. Мин 900 м ыстанан, 2 аҥаар мүнүүтэ курдук түспүтүм.

Прыжок
Көтүү

Парашюту бэйэҥ арыйбытыҥ дуо? 

Маша: Парашюту ыстанар киһи бэйэтэ көтүү үһүс сөкүүндэтигэр арыйар. Бөртөлүөттэн араҕаат, “221, 222, 223” диэн ааҕар уонна чаһы курдук утуу-субуу сиргэ сылдьан үөрэппит хамсаныыларын оҥорор. Ол өттүгэр тэрийээччилэр үөрэхтэрэ кытаанах этэ. Көтөргө көҥүлү анал тургутук ааһан ылбыппыт.

Прыжок2
Түһүү

Сиргэ түһээт, туругуҥ хайдах этэй?

Маша: Оҕо эрдэхпиттэн ыраламмыт баҕа санаам туолан, астыммытым. Холку этим. Хайаан да хатылыыр эбиппин дии санаабытым. Уонна тута кэлэр өрөбүллэргэ санаабыппын толорбутум. Аны успуорт разрядын туттарар баҕалаахпын. Ол иһин дьиҥнээх үлэ дьэ саҕаланна. Ситиһиигэ эрэллээхпин.

Маша, хоруйдарыҥ иһин махтал! Туруоруммут сыалгын хайаан да толороор! Көрсүөххэ диэри! 

Светлана ИВАНОВА

Галина ВАСИЛЬЕВА уонна Айталина ТИМОФЕЕВА хаартыскаҕа түһэриилэрэ