news

Оҕону саха тылынан иитии

“Сайдыс” оҕону сайыннарар киин дириэктэрэ Юлия Владимировналыын оҕону саха тылынан иитии, тылын-өһүн сайыннарыы туһунан сэһэргэстибит.

-- Юлия Владимировна, үтүө күнүнэн! Билигин сахалыы-нууччалыы булкуйан саҥарар оҕо олус элбээтэ. Бу туһунан тус санааҥ.

-- Кырдьык, оҕо сахалыы саҥарар таһыма күн-түүн түһэн иһэр. Билигин оҕону биир тылынан буолбакка, икки тылынан иитэр кэм кэллэ. Манна сөптөөх ньымалары туһанар наада.

  • Дьиэ иһигэр сахалыы кэпсэтии (биир-икки тылынан буолбакка, күннээҕи олоҕу ырытыһыы).
  • Оҕо нууччалыы ыйыттаҕына – сахалыы эппиэттиибит. Холобур: “Мама, мы сейчас в парк идем?” “Аһаа, билигин пааркаҕа барабыт,” – диэн сахалыы көннөрөн биэрдэххитинэ, оҕо тылын саппааһа байар.
  • Сахалыы тылынан ыытыллар куруһуоктарга сырытыннарыы.

-- “Сайдыс” киин туһунан кэпсэтиэх.

-- Оҕом оскуолаҕа киирэрин саҕана, саха тылынан ыытыллар бэлэмнэнии кууруһун көрдөөбүтүм да, булбатаҕым. Сахалыы-нууччалыы булкуйан үөрэтэр сыыһа буолан, билэр учууталбын көрдөһөн кыра бөлөх арыйбыппыт. Дьон бэйэ-бэйэлэриттэн истиһэн элбээн киирэн барбыттара. Бу курдук күн бүгүҥҥэ диэри үлэлии-хамсыы сылдьабыт.

-- Биһиэхэ 2 саастарыттан 11 саастарыгар диэри оҕолор кэлэн дьарыктаналлар. Оскуолаҕа, уһуйааҥҥа бэлэмнэнии, ааҕыы тэтимин үрдэтии, логопед көмөтө, о.д.а. куруһуоктар үлэлииллэр. Куруһуоктарбыт үксэ сахалыы тылынан ыытыллаллар. Быйылгыттын аангылыйа тылын сайыннарар куруһуогу арыйдыбыт. Тоҕо? Оҕо кыра эрдэҕиттэн тылы араара үөрэниэхтээх. Холобур, сахалыы тылынан куруһуокка оҕо учууталын кытта сахалыы кэпсэтэр, оттон аангылыйа куруһуогар аангылыйалыы. Бу бэйэтэ туспа ньыма. Маннык гынан оҕолор тылы араара үөрэнэллэр.

-- Төрөппүттэргэ баҕа санааҥ.

-- Күндү төрөппүттэр, оҕо тылын сайдыытыгар болҕомтоҕутун ууруҥ. Дьиэҕит иһигэр сахалыы кэпсэтиҥ.