news

Учуутал күнүгэр дьоһуннаах бэлэх

Учуутал күнүгэр бэртээхэй бэлэҕи Үөһээ Бүлүү Д.С.Спиридонов аатынан орто оскуолата тутта. Ол туох эбитий, ким бэлэхтээбитин сиһилии ыстатыйаҕа ааҕыҥ.


Үтүөҕэ-кэрэҕэ угуйар оскуола барахсан хас биирдии киһиэхэ ураты миэстэни ылар. Муударай, дьоҕурдаах учууталларбыт чиҥ билиини иҥэрэллэр, сырдыкка сирдииллэр, үрдүккэ кынаттыыллар, үтүөҕэ үөрэтэллэр.

Үөһээ Бүлүү килбэйэр киинигэр, Д.С.Спиридонов аатынан орто оскуола тиэргэнигэр, урут И.Н.Барахов аатынан оскуола баара. Манна тыһыынчанан оҕо-аймах үөрэнэн ааспыта, сүүһүнэн ахсааннаах араас көлүөнэ учууталлара үгүс ыччаты билиигэ сирдээбиттэрэ, олоххо бэлэмнээбиттэрэ. Бу ытык сир тиэргэнигэр, алтынньы 3 күнүгэр, ураты тэрээһин буолла. И.Н.Барахов аатынан орто оскуоланы 1980 сыллаахха бүтэрбит выпускниктар оскуолаҕа анаан дьоһуннаах бэлэх оҥордулар. Учуутал күнүгэр анаан үөрэммит кыһаларын тиэргэнигэр оҕолор үрүттээх кыра тутууну, бэртээхэй оҥоһуулаах беседканы туруордулар. Бу тутууну оскуола выпускниктара Анатолий Николаевич Михайлов, Егор Алексеевич Анисимов, Анатолий Петрович Захаров, Василий Анемподистович Салгынов, Леонид Иванович Семёнов сүрэхтэрин сылааһын иҥэрэн туран, кичэйэн туппуттар. Оттон сырдык лаампалардаах банаардары Саха гимназиятын дириэктэрэ Валентина Васильевна Софронеева туруортарда.

c5e476da 6cdf 408b b717 96086597d138
Бэлэҕи туттарыы

Үөрэммит сылларын туһунан Валентина Васильевна манныгы ахтар: «1980 сыллаахха, Москваҕа олимпиада буолбут сылыгар, үс кылаас тэҥинэн бүтэрбиппит. Кылаас салайааччыларынан X «А» кылааска нуучча тылын уонна литературатын учуутала В.А. Багдасаева ,X «Б» кылааска немец тылын учуутала Н.Т. Перетолчина , X «В» кылааска аангылыйа тылын учуутала А.Н. Богданова  хорутуулаахтык үлэлээбиттэрэ. Директорынан Д.С. Спиридонов бэрт таһаарыылаахтык улахан коллективы үлэлэппитэ. Үөрэммит оскуолаларбыт суохтарыттан хараастабыт, ол иһин сүбэлэһэн баран, сүүрбүт-көппүт тиэргэммитигэр  биһигини  түмэр сиринэн беседка буоллун диэн санааҕа кэлбиппит уонна бу үйэлээх тутууну ис сүрэхтэн бэлэхтиибит. Күндү учууталларбыт албан ааттара туруо, эһиэхэ махтана-сүгүрүйэ, эдэр көлүөнэҕэ мэлдьи киэн тутта кэпсии туруохпут. Онтон биһиги ахтар-саныыр оскуолабыт тиэргэнигэр өрүү кэлэ туруохпут, оҕо сааспыт биир кэрэ миэстэтин сүрэхпитигэр илдьэ сылдьыахпыт».

Чуораан лыҥкынас тыаһынан бу тэрээһин кыттыылаахтара 50 сыл анараа өттүгэр маҥнайгы кылааска киирбиттэрин, оскуоланы бүтэрбиттэрэ төгүрүк сыл буолбутун долгуйа аҕыннылар. Кинилэр ортолоругар бааллар: X «А» кылаас комсора, Ю.Н. Прокопьев аатынан орто оскуола алын сүһүөх кылааһын учуутала Саргылана Григорьевна Андреева, улуус администрациятын тутаах исписэлииһэ Фаина Евстафьевна Иванова, үөрэх салаатын исписэлииһэ Любовь Николаевна Алексеева, оҕо дьиэтин соцпедагога Маргарита Герасимовна Цой, киин бибилэтиэкэ үлэһитэ Люлия Юрьевна Дярикова, тутуу үлэһитэ Егор Алексеевич Анисимов, “Үрүйэчээн”  оҕо уһуйаанын үлэһитэ Анатолий Николаевич Михайлов.

Билигин 1980 сыл, олимпийскай сыл, үөрэҕи бүтэрээччилэр өрөспүүбүлүкэ араас салааларыгар бэрт таһаарыылаахтык үлэлии-хамсыы сылдьаллар. Бу үтүө дьыалаҕа куоракка олорор бииргэ үөрэммит оҕолоро бары күүс-көмө буоллулар.

3b7fd6d1 c3a5 449f 8690 0bf7ac930007
1980 сыл оскуоланы бүтэрбиттэр

Бэртээхэй бэлэҕ иһин махтал тылын оскуола директора, Россия үөрэҕириитин Бочуоттаах үлэһитэ Юрий Васильевич Кынатов эттэ. Оскуоланы бүтэрэн баран түөрт уон сылы быһа тутуспутунан сылдьыы – бу үчүгэй холобур буоларын тоһоҕолоон бэлиэтээтэ.

Оскуола бары үөрэнээччилэрэ, үлэһиттэрэ бу бэртээхэй бэлэххитигэр ис сүрэхпититтэн 1980 сыл выпускниктарыгар истиҥник махтанабыт. “Үлэҕитигэр ситиһии эҥээрдэстин, олоххутугар дьол-соргу тосхойдун, түбүктээх үлэҕит үтүө түмүктээх буоллун!” — диэн баҕа санаа бастыҥын аныыбыт.

Ыстатыйаны бэлэмнээтэ Марина Сергеевна ЯКОВЛЕВА

Ааптар хаартыскаҕа түһэриилэрэ